الرئيسية 10 اسبوعيات بريه النقاد 10 اسبوعيات بريه النقاد ٢

اسبوعيات بريه النقاد ٢

.. عيدكم مبارك ، يعلكم معيدين بتله ، ويازينكم ويازين عيدكم ، وناسة والله ، حفلات واجتماعات وعروس .

.. بكل حارة من حارات بريدة حفل ، والله شي زين ،، بس ياحول بعض الحارات مادخلوها ضمن ( عيدنا في حينا ) ، وبعض الحارات صدت عنهم الأمانة مازينت محل احتفالاتهم .

.. صور الاحتفالات زينة ، وشغل الجهات زين ، وتشكر الشئون والأمانة ، بس ترا العدل زين .

.. المجلس البلدي أشوفه يعايد أهل بريدة ، حطوا لوحات بالشوارع ، زين أثر عندنا مجلس بلدي ، آسف نسيت إلا عندنا مجلس .

.. حتى لجنة أهالي بريدة عايدونا ، ومددوا حفل العيد ، نقول يا الله بداية خير .

.. لعبي الخوف ، ما أدري ، خايف من كورونا ، وخايف أضيع بالأسياب المتسددة بالتخرصي ، عفوا قصدي التخصصي ، ودي أعايد مرضاه ، بس وش أسوي ، أخاف أدخل ما أطلع ، يرقدونن همن يقولون كورونا .

.. شفتوا مرضى الدرن الله يشفيهم ، تراهم مساكين ، مالهم قسم ، من عقب ذاك الغامدي اللي ألغى مستشفاهم ( الله يعينه على أثمهم ) ، وهم دمرانين ، مالقوا ولي يفزع لهم .. والله ياحالتهم حالة .

.. واحد ياحتسين يقول لي ورانا حنا ياجنوب وياغرب وشرق بريدة تقل ماحنب من السكان ، مالنا ذكر من خيرات الأمانة ، حتى لمبات العيد مانين علينا به ، الشمال يبرق برق ، وحنا تقل قرية بالصومال .

.. سبحان الله ماوفقنا بمسئول يسكن هناك كان يحطوننا بوسط وردة من القهر ، وليتهم على اللمبات ، منعدمين من التجميل والمناظر ، شجرنا برسوبس ، ماعندنا من المناظر غير دلال الفاخرية اللي من يوم أنا دادا وأنا خابرهن ومرش السادة .

.. لا نوافير ولا ورد ، ولا دورات تفتح النفس ، ولاشوارع زينة ، ليتهم يكتبون أمانة شمال بريدة وبس ، وغير هذا الاتجاه بالحرقة .

.. تحويلات ، صبات ، شوارع مسددة ، دورات خراص ، والله من الشي يامرور ، ماهنا دبرة فنان ، دبرة مهندس يعرف يوارب الأمور ، موب بس سد ذا وافتح ذا .

.. أعرف مدير يقلب بمدراء الأقسام تقليب ، بيعدل الحال ، ياحبيبي والله لو تحوقهم حوق ، نظامكم قديم ، نظامكم علة .. عدله ، قبل لا يقلبك وزيرك .

.. جامعة القصيم ماتبي الا من القصيم ، تقل صارت عنصرية ، طيب أهلنا اللي جوا من الرياض ومن حايل وتبوك ، ورجعوا سكنوا ببريدة ، وين يسجلون عيالهم بوه ، همانا بلد واحد .

.. المشكلة ماعلموا بطريقتهم الجديدة وتوهيقتهم الخاطمة الا يوم قفل التسجيل ، أقول الله يعين ديوان المظالم ، بيمتلي من المشتكين .

.. أكثر ما أبلش بوه ، اذا جاني ضيف من غير بريدة ، اجلس اوصف له من يدخل الدايري ، هما بس بريدة مالها مسميات بالدايري ، ومدير الطرق الجديد اذكره صرح بيعدلون ،أقول صوت رحاء بس .

.. من شاف مركز الهلال الأحمر بالضاحي ، ياهو نكته ، شبيك حاجرهم ، اللي بيضحك يروح يشوفه ، سجلوا تقدم جديد ، طق شبك وجمع سيارات يصير مركز .

.. وعدنا الأسبوع الجاي ، نجيب لكم شي جديد ، شي مايزعل ، الله لايجيب الزعل ، عيدوا بخير .

شارك برأيك حول الخبر باضافة رد

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.