الرئيسية 10 اسبوعيات بريه النقاد 10 اسبوعيات بريه النقاد “1”
بريه النقاد

اسبوعيات بريه النقاد “1”

بريه النقاد

.. ياتسيف هي حالتن حالة ، ياتسيف أني منغبن ، الحين وش اببدا بوه ، وش ابحتسي بوه .

.. يوم ان “بلاغ” اعلنت رغبتن منه باكتتاب من وده يكتب ، قلن يمتكن اكتب انتقاداتي به ، هماهم يلقبونن ببريه النقاد .

.. عاد اسمحوا لي تكفون ، بشتغل نقد ، بس تراه نقدن زين ، لايجرح ، ولاينقص من حق الناس اللي تشتغل ، ابي بس أذكر عبر هالمقال ، اللي أشوفه ويمكن أنه مغفولن عنه ، عاد يازينها قولة مقال ، والله وصار لك يابريه عمود ، عمود تكتب به ، مب عمود تربط به سيكلك منول .

.. نسيت وش ببدا بوه ، تدرون ، ابحتسي وأقول :

.. ياحليلهم حقين المرور ، بس يسددون بهالشوارع ، مايبون ينظمون السير إلا بصبات تصك شوارعنا ، صرت إذا أبي محيل بالسوق او حول الجردة او الصفراء ، كود احيوط له حيوطتن تنرفزن ، بس ألعن اللي قدامي .

.. حتى مواقف سوق النافورة سدوها وصاروا هالشباب يلبزون سياراتهم ببيبان أهل البيوت ، فطست من الضحتس يوم شفت الحارة اللي غرب السوق ، كل سيارات بريده ملبزتن به .

.. الحين مستشفى بريدة متى يكمل ، او صح أبو شماله صار أهم شي أنه جاء ، ياليت شفنا فرحة حقين المستشفى باكتمال باقي المستشفى مثل فرحتهم بأبو شماله .

.. ولاهب سادنا اكتمال المشروع نبي دكاترتن زينين ، موب تجميع هاللي يتعلمون بنا ، وبعدين وراهم مايجيبون لنا دكاترتن سعوديين مثلنا مثل غيرنا ، الدكتور السعودي ماهنا زينه ولا نرتاح الا له ، تسذا من الله ، ولانه حريص بعد .

.. أما عاد التخصصي ، والله لو ابتل احتسي عنه مايسدكم ولا شهر ، هم مير غسلوه من كورونا ، اللي صار نكته اكبر من نكتة تحسين البنية التحتية ، ياعندنا مطرسة وبس ، من مبطي وهم ماقضوا من هالبنية ، البنية ياليتها تسنها بنية كلاي الله يرحمه يوم تقضي على منافسينه .

.. التخصصي ودنا يقال عنه تخصصي مو تخرصي ، والله اني ماتسذبت أبد ، كلنا نقول أنه تخرصي ، حتى سبحان الله ماوفز بمدراء ماهنا زينهم ، عقب هاشم ناضره الله يذكره بخير ماشفنا أحد نصفز له .

.. ياعندي حتسي ، مليان اثمي منه عن التخرصي ، اوه آسف قصدي التخصصي ، بس بحتسيه كل مرة ، موب الحين لأنه طوووووووويل ، يعني بكل مقال ، نعطيكم جرعة وقاية .

.. الحين لو بوصف لواحد جاي من الجنوب بيجي لم الشمال ، وشلون ، كل شوارعنا متسدده ، والأمانة ، ماحطت لنا خطوط بديلة ، أصلا مابش بديلة ، البديلة بعد محفرة .

.. ودي أقوله تعال بهيلكوبتر ، بس أخاف يزعل ، يقول تتطنز ، وأنا قسم بالله ما اتطنز ، هذا الواقع ، لكن بكيفه بوصف له ، وبروح أنا أقضي أشغالي وأدري أنه بيجي بعد ساعتين ، ههههه لأنه بيلفلف لين يستدير راسه .

.. عندي فكرة ، ورا مانطلع عن بريدة لنا كم سنة ، يمكن تصلح شوارعنا ، نروح بهالنفد ونطالب بمدينة بديلة ، عاد تصدقون ان تقضي المدينة البديلة ماقضت حفريات بريدة .

.. ياليت لي سلطة ، والله لانفض لكم حقين المياه نفض ، أجل يخربون شوارعنا بحفرياتهم ولا يرجعونهن مثل منول ، قسم بالله لأمسك مهندس المشروع ومراقب البلدية وحق المقاول ، وأعلمهم أن الله حق ، بصراحة مصخروا بنا ، حفرياتهم خربت شوارعنا ، لا وتنهار بعد ، وين الرقابة ، صز من قال إذا غاب البس العب يافار .

.. بوه مدارس تخر ، يا الله عاد وين تقال بوه ، وخزياه ، مدارس توه مبنيه تخر ، المدرسين والأبلات بس يلاحزون الخرير بطياسهم ، هههههه ، لا والمصيبة ياكثر فرزعة عدادات الكهرب ، الظاهر يبي لنا واحد جزوم ، قبل يدرس بهن هالمدارس يدس اصبعه بالافياش ، ان الشطه الكهرب فالدعوا دبور ، وان سلم فهي نعمة .

.. تبون عاد اعلمكم ، تراي طولت عليكم ، بس ودي قبل لأسكر عمودي ، ودي أن أميرنا الذيب ، أميرنا البطل يواصل جوالاته الميدانية ، واقوله ياطويل العمر ترا جولاتك خلت بعض الناس يتنافض ويتحرك ، الله يجعلك ذخر لنا .

شارك برأيك حول الخبر باضافة رد

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.